उद्यापासून विशाल परब मैदानात; विजयाचा निर्धार
सावंतवाडी दि २: आगामी जिल्हा परिषद आणि पंचायत समिती निवडणुकीच्या रणधुमाळीत दोडामार्ग तालुक्यात आता राजकीय वातावरण अधिकच तापणार आहे. भाजपचे युवा नेते विशाल परब उद्यापासून (३ फेब्रुवारी) तालुक्यात प्रचाराचे वादळ घेऊन मैदानात उतरणार आहेत. महायुतीच्या उमेदवारांना विजयी करण्यासाठी त्यांनी कंबर कसली असून, या दौऱ्यामुळे स्थानिक कार्यकर्त्यांमध्ये प्रचंड उत्साहाचे वातावरण पाहायला मिळत आहे.
महायुतीची आधीच मोठी आघाडी
या निवडणुकीत महायुतीने सुरुवातीलाच आपले वर्चस्व सिद्ध केले आहे. खासदार नारायण राणे, भाजपा प्रदेशाध्यक्ष रवींद्र चव्हाण, पालकमंत्री नितेश राणे आणि जिल्हाध्यक्ष प्रभाकर सावंत यांच्या सक्षम मार्गदर्शनाखाली महायुतीची वाटचाल सुरू आहे. विशेष म्हणजे, जिल्ह्यातील २५ उमेदवार आधीच बिनविरोध निवडून आल्यामुळे महायुतीचे पारडे जड झाले आहे.
दोडामार्गच्या ‘नऊ’ जागांवर लक्ष
आता सर्वांचे लक्ष दोडामार्ग तालुक्यातील उर्वरित जागांकडे लागले आहे. यामध्ये जिल्हा परिषद: ३ जागा
पंचायत समिती: ६ जागा यांचा समावेश आहे.
या नऊही जागांवर महायुतीचा भगवा फडकवण्यासाठी विशाल परब स्वतः मैदानात उतरून प्रचार करणार आहेत. विशाल परब यांचा ग्रामीण भागातील दांडगा जनसंपर्क आणि तरुणांमधील असलेली लोकप्रियता महायुतीसाठी जमेची बाजू ठरणार आहे.
“दोडामार्ग तालुक्यातील सर्व नऊ उमेदवार मोठ्या मताधिक्याने निवडून येतील, असा आम्हाला ठाम विश्वास आहे. कार्यकर्त्यांचा उत्साह आणि जनतेचा प्रतिसाद पाहता महायुतीचा विजय निश्चित आहे.”
— विशाल परब (युवा नेते, भाजप)
या दौऱ्यामुळे दोडामार्गच्या राजकीय समीकरणांमध्ये मोठी उलथापालथ होण्याची शक्यता वर्तवली जात असून, विरोधकांसमोर मोठे आव्हान उभे राहिले आहे.