महायुतीच्या प्रचारासाठी भव्य सभेचे आयोजन
कुडाळ दि.०२ सिंधुदुर्ग जिल्हा परिषद आणि पंचायत समिती निवडणुकीच्या रणधुमाळीने आता वेग घेतला आहे. महायुतीच्या उमेदवारांच्या प्रचारासाठी आणि शक्तीप्रदर्शनासाठी राज्याचे उपमुख्यमंत्री एकनाथ शिंदे यांची उद्या, मंगळवारी (३ फेब्रुवारी) दुपारी ३ वाजता कुडाळ येथील हायस्कूलच्या मैदानावर भव्य जाहीर सभा आयोजित करण्यात आली आहे.
आमदार निलेश राणे यांच्याकडून जय्यत तयारी
या सभेचे नियोजन कुडाळ-मालवणचे आमदार निलेश राणे यांनी स्वतः हाती घेतले आहे. आज सायंकाळी त्यांनी सभास्थळी जाऊन तयारीचा सविस्तर आढावा घेतला. कार्यकर्त्यांसाठी मोठी आसनव्यवस्था आणि भव्य व्यासपीठ उभारण्याचे काम युद्धपातळीवर सुरू आहे. निलेश राणे यांनी सुरक्षेच्या उपाययोजना आणि सभेच्या एकूण व्यवस्थेची बारकाईने पाहणी केली.
जिल्ह्यातील राजकीय वातावरण तापले
जिल्हा परिषद निवडणुकीत सध्या महायुती आणि महाविकास आघाडी यांच्यात अटीतटीची लढत पाहायला मिळत आहे. या पार्श्वभूमीवर एकनाथ शिंदे यांची ही सभा महायुतीसाठी अत्यंत महत्त्वाची मानली जात आहे. या सभेमुळे कार्यकर्त्यांमध्ये नवा उत्साह संचारून महायुतीच्या उमेदवारांच्या विजयाचा मार्ग सुकर होईल, असा विश्वास युतीच्या नेत्यांनी व्यक्त केला आहे.
प्रमुख नेत्यांची उपस्थिती
आमदार निलेश राणे यांच्यासोबत आजच्या पाहणी दौऱ्यावेळी खालील पदाधिकारी उपस्थित होते:
रवींद्र फाटक (शिवसेना नेते),
काका कुडाळकर,राजेश मोरे,अभिषेक गावडे यांच्यासह महायुतीचे अनेक पदाधिकारी आणि कार्यकर्ते यावेळी उपस्थित होते.उद्याच्या सभेला कुडाळ, मालवणसह संपूर्ण जिल्ह्यातून शिवसैनिक आणि भाजप कार्यकर्त्यांची मोठी गर्दी होण्याची शक्यता वर्तवण्यात येत आहे.