कणकवली दि.२६:तालुक्यातील ओटव येथे राहणाऱ्या ६६ वर्षीय आजीचे तोंड दाबून, त्यांना बेडरूममध्ये डांबून सोन्याचे दागिने लंपास करणाऱ्या नातवाला आणि त्याच्या मित्राला अटक करण्यात स्थानिक गुन्हे अन्वेषण विभागाला (LCB) यश आले आहे. साईल उर्फ सिद्धेश मिलिंद रसाळ (२३, रा. विरार) आणि त्याच्या मित्राला पोलिसांनी मीरा-भाईंदर परिसरातून ताब्यात घेतले असून, त्यांनी गुन्ह्याची कबुली दिली आहे.
नेमकी घटना काय?
२२ एप्रिल रोजी सकाळी ११:३० च्या सुमारास ओटववाडी येथील सुवर्णा नारायण रावले या आपल्या घरात स्वयंपाक करत होत्या. यावेळी त्यांचा नातू साईल रसाळ हा त्याच्या एका मित्रासह घरात शिरला. या दोघांनी आजींशी झटापट करत त्यांचे तोंड दाबले आणि त्यांना ओढत बेडरूममध्ये नेले. त्यानंतर आजीच्या गळ्यातील १ लाख रुपये किमतीची दोन तोळ्यांची चेन आणि ४५ हजार रुपये किमतीची साडेनऊ ग्रॅमची सोन्याची चेन, असा एकूण १ लाख ४५ हजार रुपयांचा ऐवज जबरदस्तीने हिसकावून घेतला.
चोरी करून पळून जाताना फिर्यादी सुवर्णा रावले यांनी साईलला बेडरूमच्या खिडकीतून ओळखले होते. याप्रकरणी कणकवली पोलीस ठाण्यात गुन्हा दाखल करण्यात आला होता.
एलसीबीची दमदार कामगिरी
गुन्ह्याचे गांभीर्य ओळखून पोलीस अधीक्षक मोहन दहिकर आणि अपर पोलीस अधीक्षक नयोमी साटम यांनी तपासाचे आदेश दिले होते. स्थानिक गुन्हे अन्वेषण विभागाचे पोलीस निरीक्षक प्रवीण कोल्हे यांच्या मार्गदर्शनाखाली पथकाने तांत्रिक तपास आणि माहितीच्या आधारे आरोपींचा माग काढला.
अखेर मीरा-भाईंदर परिसरात सापळा रचून दोन्ही आरोपींना ताब्यात घेण्यात आले. या कारवाईत पोलीस उपनिरीक्षक हनुमंत भोसले, सहाय्यक पोलीस उपनिरीक्षक राजू जामसंडेकर, ज्ञानेश्वर तवटे, किरण देसाई आणि डिसोजा यांच्या पथकाने महत्त्वाची भूमिका बजावली.
पुढील तपास सुरू
ताब्यात घेतलेल्या दोन्ही आरोपींना कणकवली पोलिसांच्या हवाली करण्यात आले आहे. घरच्याच नात्याने विश्वासाला तडा देत केलेल्या या चोरीमुळे ओटव परिसरात खळबळ उडाली आहे. पोलीस आता या प्रकरणाचा अधिक तपास करत असून चोरीला गेलेला मुद्देमाल हस्तगत करण्याची प्रक्रिया सुरू आहे.
🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज*🪐 *वेबसाईट* : hindustanlivenh@gmail.com 🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :📱9422054887,8275659563