जखमी रशियन दाम्पत्यावर उपचार करताना डॉक्टर सोबत सामाजिक बांधिलकीचे सदस्य आणि पोलीस
‘सामाजिक बांधिलकी’ने मदतीचा हात देत जपली माणुसकी
सावंतवाडी दि.०२: येथील रेणुका हॉटेल परिसरात काल सायंकाळी रशियन पर्यटक दाम्पत्याच्या दुचाकीला भीषण अपघात झाला. या अपघातात दोघेही गंभीर जखमी झाले असून, ‘सामाजिक बांधिलकी’ चॅरिटेबल ट्रस्टच्या कार्यकर्त्यांनी आणि पोलिसांनी तत्परता दाखवत त्यांना तातडीने उपचार मिळवून दिले. पर्यटकांच्या मदतीला धावून जाणाऱ्या या पथकाचे सर्वत्र कौतुक होत आहे.
मिळालेल्या माहितीनुसार, काल सायंकाळी हे रशियन जोडपे आपल्या मोटरसायकलवरून जात असताना रेणुका हॉटेलजवळ त्यांच्या गाडीला अपघात झाला. हा अपघात इतका भीषण होता की, यामध्ये रशियन पर्यटकांच्या हात, पाय आणि खांद्याला गंभीर दुखापत झाली. रक्ताच्या थारोळ्यात पडलेल्या या परदेशी पर्यटकांना पाहून परिसरातील नागरिकांमध्ये चिंतेचे वातावरण होते. वेळेवर मिळाली मदत
अपघाताची माहिती मिळताच सामाजिक बांधिलकी टीमचे रवी जाधव, रूपा मुद्राळे, आणि लक्ष्मण कदम यांनी घटनास्थळी धाव घेतली. त्यांनी जखमींना धीर देत तातडीने सावंतवाडी उपजिल्हा रुग्णालयात दाखल केले. केवळ रुग्णालय गाठून न थांबता, उपचार सुरू होईपर्यंत त्यांनी सर्वतोपरी सहकार्य केले.
याकामी सावंतवाडी पोलीस ठाण्याचे महेश जाधव आणि मनोज राऊत यांनीही मोलाची भूमिका बजावली. परदेशी पर्यटकांना भाषेची अडचण येऊ नये आणि त्यांना योग्य उपचार मिळावेत, यासाठी पोलीस आणि सामाजिक कार्यकर्त्यांनी समन्वयाने काम केले. सामाजिक भावनेचे दर्शन
कोकणात पर्यटनासाठी आलेल्या परदेशी पाहुण्यांवर ओढवलेल्या या संकटकाळात स्थानिक कार्यकर्त्यांनी दाखवलेल्या तत्परतेमुळे माणुसकीचे दर्शन घडले आहे. सध्या जखमी पर्यटकांवर उपजिल्हा रुग्णालयात उपचार सुरू असून त्यांची प्रकृती स्थिर असल्याचे समजते.
