सावंतवाडी दि.२२: येथील उपजिल्हा रुग्णालयातील सोयीसुविधांचा अभाव आणि प्रलंबित समस्यांबाबत वाढत्या तक्रारींची गंभीर दखल घेत, नगराध्यक्षा सौ. श्रद्धाराजे सावंत भोसले यांनी पालिका प्रशासकीय भवनात तातडीची आढावा बैठक घेतली. या बैठकीत रुग्णालयाचे नूतनीकरण, पाणीपुरवठा, स्वच्छता आणि डॉक्टरांच्या निवासस्थानांचा प्रश्न मार्गी लावण्यासाठी त्यांनी ठोस निर्णयांची घोषणा केली.
पालिका आणि सार्वजनिक बांधकाम विभागात समन्वय बैठकीत रुग्णालयातील विविध विकासकामांच्या अंदाजपत्रकांवर चर्चा करण्यात आली. सार्वजनिक बांधकाम विभागाने या कामांचे प्रस्ताव तातडीने सादर करावेत, असे निर्देश नगराध्यक्षांनी दिले. यासाठी लागणारा निधी उपलब्ध करून देण्यासाठी पालकमंत्री नितेश राणे यांच्याशी आपण स्वतः चर्चा करणार असल्याचे त्यांनी आश्वस्त केले.
पाणीपुरवठा आणि स्वच्छतेवर भर
रुग्णालय परिसरातील वाढलेली झाडे आणि अस्वच्छतेबाबत बांधकाम विभाग व नगरपालिकेने समन्वयातून साफसफाई करण्याचे आदेश देण्यात आले. पाणीपुरवठ्याचा प्रश्न सोडवण्यासाठी, रुग्णालयाची मागील थकीत देयके भरून, त्यावरील व्याज माफ करण्याचा प्रस्ताव शासनाकडे पाठवला जाणार आहे. त्यानंतरच नवीन नळ कनेक्शन देण्यात येईल, जेणेकरून भविष्यात पाणीपुरवठा सुरळीत राहील.
रुग्णसेवेसाठी नवीन सोयीसुविधा
रुग्णांच्या नातेवाईकांची गैरसोय टाळण्यासाठी नगरपालिकेच्या माध्यमातून रुग्णालयात नवीन बाक (बेंचेस) बसवण्यात येणार आहेत. तसेच, पोस्टमार्टम रूमचे नूतनीकरण आणि रुग्णालयाच्या बाहेर पथदिवे बसवण्यासाठी तातडीने अंदाजपत्रक सादर करण्याच्या सूचना बांधकाम विभागाला देण्यात आल्या आहेत. याशिवाय, व्हीलचेअरची कमतरता दूर करण्यासाठी जिल्हा नियोजन समितीकडे निधीची मागणी करण्यात आली आहे.
डॉक्टरांच्या निवासस्थानासाठी विशेष तरतूद
उपजिल्हा रुग्णालयातील डॉक्टरांची सध्याची निवासस्थाने पडझडीच्या अवस्थेत असल्याने, तिथे नवीन निवासस्थाने बांधण्यासाठी विशेष निधीची तरतूद केली जाईल, असेही सौ. भोसले यांनी स्पष्ट केले.या बैठकीस उपनगराध्यक्ष एड. अनिल निरवडेकर, आरोग्य सभापती सुधीर आडिवरेकर, पाणीपुरवठा सभापती प्रतीक बांदेकर, सार्वजनिक बांधकाम विभागाच्या कार्यकारी अभियंता पूजा इंगवले, उपअभियंता अजित पाटील, रुग्णालय अधीक्षक डॉ. ज्ञानेश्वर ऐवळे, रुग्णालय कृती समितीचे सदस्य संजय लाड यांच्यासह सर्व विषय समिती सभापती, नगरसेवक व अधिकारी उपस्थित होते. रुग्णालयातील अपुऱ्या सुविधा आणि थकीत देयके लवकरच मार्गी लागल्यास सावंतवाडीच्या आरोग्य यंत्रणेला मोठा दिलासा मिळणार आहे.
🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज**वेबसाईट* :hindustanlivenh@gmail.com 🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :📱9422054887,8275659563