सावंतवाडी दि.१४: “सावंतवाडी उपजिल्हा रुग्णालय हे फक्त नावापुरतंच उरलं असून ते केवळ कुंकवाला आधार बनलं आहे,” असा घणाघाती आरोप महाराष्ट्र नवनिर्माण सेनेचे जिल्हाध्यक्ष ॲड. अनिल केसरकर यांनी केला आहे. रुग्णालयातील ढिसाळ कारभार आणि डॉक्टरांच्या हलगर्जीपणावर तीव्र संताप व्यक्त करत, २४ तासांत रुग्णावर उपचार न झाल्यास रुग्णालयाला टाळे ठोकू, असा इशारा मनसेने दिला आहे. या गंभीर परिस्थितीबाबत जिल्ह्याचे पालकमंत्री आणि स्थानिक आमदारांना थेट जाब विचारणार असल्याचेही त्यांनी स्पष्ट केले.
बांदा येथील प्राथमिक आरोग्य केंद्रातून तापाच्या एका रुग्णाला पुढील उपचारासाठी सावंतवाडी उपजिल्हा रुग्णालयात पाठवण्यात आले होते. मात्र, रुग्णालयात दाखल केल्यापासून तब्बल २४ तास उलटून गेले, तरी या रुग्णावर साधे उपचारही करण्यात आले नाहीत किंवा कोणत्याही डॉक्टराने त्याची साधी विचारपूसही केली नाही. अखेर रुग्णाला बांदा येथे आधी मिळालेली गोळी स्वतःच घ्यावी लागली, परंतु तरीही त्याचा ताप कमी झाला नाही.
योगायोगाने, मनसे अध्यक्ष राज ठाकरे यांच्या वाढदिवसानिमित्त रुग्णालयात रुग्णांना फळ वाटप करण्यासाठी गेलेल्या मनसे पदाधिकाऱ्यांच्या निदर्शनास हा प्रकार आला. याविषयी जाब विचारण्यासाठी मनसे कार्यकर्त्यांनी प्रभारी वैद्यकीय अधीक्षक डॉ. संदीप सावंत यांना बोलावले, मात्र ते उपस्थित झाले नाहीत. तेथे उपस्थित असलेल्या इतर वैद्यकीय कर्मचाऱ्यांनी “रुग्णाची तपासणी करून औषधोपचार व्हायला हवे होते” एवढेच मोघम उत्तर दिले. यावर संतप्त होत ॲड. केसरकर म्हणाले, “जर रुग्णांना तपासायचे सोडून केवळ गोव्याला (बांबोळी) रिफर करायचे असेल, तर या रुग्णालयाला टाळे ठोकलेले बरे. रुग्णांच्या जिवाशी चाललेला हा खेळ मनसे खपवून घेणार नाही.”
या असुविधेव्यतिरिक्त आज रुग्णालय परिसरात साप निघाल्याची घटनाही समोर आली. मात्र, रुग्णालय प्रशासनाने या सुरक्षिततेच्या मुद्द्याकडेही पूर्णपणे डोळेझाक केल्याचे मनसेने सांगितले. या आंदोलनात ॲड. अनिल केसरकर यांच्यासोबत राजू कासकर, मिलिंद सावंत, सुधीर राऊळ यांच्यासह अनेक मनसे पदाधिकारी आणि कार्यकर्ते उपस्थित होते.
प्रभारी वैद्यकीय अधीक्षकांचा खुलासा:
या संपूर्ण प्रकरणाबाबत प्रभारी वैद्यकीय अधीक्षक डॉ. संदीप सावंत यांच्याशी संपर्क साधला असता, त्यांनी आपण आज रजेवर असल्याचे सांगितले. मात्र, “रजेवर जाण्यापूर्वी आपण सहकारी डॉक्टरांना या रुग्णाबाबत कल्पना दिली होती. त्यानुसार संबंधित डॉक्टरांनी रुग्णाची तपासणी केली असून, त्याच्यावर सध्या उपचार सुरू आहेत,” अशी माहिती त्यांनी दिली. प्रशासनाकडून सारवासारव केली जात असली, तरी या घटनेमुळे सावंतवाडी उपजिल्हा रुग्णालयातील आरोग्य व्यवस्थेचे धिंडवडे निघाल्याचे चित्र समोर आले आहे.
🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज*
🪐 *वेबसाईट* : hindustanlivenh@gmail.com
🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com
📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :
📱9422054887,8275659563