माजी आमदार वैभव नाईक यांचा घणाघात

कुडाळ दि.०२: जिल्ह्यात सत्ताधाऱ्यांनी गेल्या २५ वर्षांत शाश्वत विकासाऐवजी भ्रष्टाचारातून स्वतःची माया जमवली असून, महायुती सरकारच्या काळात जिल्हा परिषदेच्या अनेक महत्त्वपूर्ण योजना रखडल्या आहेत, अशी बोचरी टीका माजी आमदार वैभव नाईक यांनी केली. कुडाळ-मालवण मतदारसंघातील जिल्हा परिषद आणि पंचायत समिती निवडणुकीसाठी ठाकरे शिवसेनेचा ‘वचननामा’ प्रसिद्ध केल्यानंतर आयोजित पत्रकार परिषदेत ते बोलत होते.

वचननाम्यातील प्रमुख मुद्दे आणि सत्ताधाऱ्यांवर आरोप
ठाकरे शिवसेनेने या निवडणुकीत ४४ जागांवर उमेदवार उभे केले आहेत. या निमित्ताने वैभव नाईक यांनी विद्यमान आमदार आणि पालकमंत्र्यांच्या कारभाराचे वाभाडे काढले. त्यांनी मांडलेले मुख्य मुद्दे खालीलप्रमाणे:
आरोग्य व्यवस्थेचे धिंडवडे: जिल्ह्यातील ३८ आरोग्य केंद्रांपैकी केवळ ४ केंद्रांमध्ये एमबीबीएस डॉक्टर उपलब्ध आहेत.
शिक्षणाकडे दुर्लक्ष: जिल्हा परिषदेच्या शाळा सातत्याने बंद पडत असून शैक्षणिक दर्जा खालावला आहे.
भ्रष्टाचाराचा कळस: जलजीवन मिशनची कामे अपूर्ण असून विकासकामांमध्ये टक्केवारीचे प्रमाण वाढले आहे. निविदेसाठी (Tenders) जिल्हा परिषदेत बाउन्सर बोलावले गेल्याची आठवणही त्यांनी करून दिली.
योजनांची टाळेबंदी: जिल्ह्यासाठी महत्त्वाची असलेली ‘सिंधुरत्न योजना’ बंद करण्यात आली, तर मनरेगाची मजुरी अद्याप थकलेली आहे.
धनशक्तीचा वापर: मागील निवडणुकांमध्ये पैसे वाटप करून मते मिळवली गेली, आता तर विरोधी उमेदवारांना २५ ते ४० लाखांचे आमिष दाखवून निवडणूक बिनविरोध करण्यासाठी दबाव टाकला जात आहे.
“जिल्हा परिषद हा विकासाचा कणा आहे, मात्र १९९७ पासून सत्तेत असलेल्या त्याच चेहऱ्यांनी जिल्ह्याचा विकास करण्याऐवजी स्वतःचे बंगले आणि बँक बॅलन्स वाढवले आहेत. पुन्हा तेच लोक निवडून आले तर भ्रष्टाचाराची परिसीमा गाठली जाईल.” — वैभव नाईक, माजी आमदार

सतीश सावंतांच्या भाजप प्रवेशावर टोला
सतीश सावंत यांच्या भाजप प्रवेशावर बोलताना नाईक म्हणाले की, “जर ते विकासासाठी भाजपमध्ये गेले असतील, तर त्यांची विकासाची नेमकी व्याख्या काय आहे हे त्यांना विचारावे लागेल. कोणता विकास पाहून त्यांनी हा निर्णय घेतला, हे मी त्यांना नक्कीच विचारेन.”
कुडाळ-मालवणमध्ये स्वाभिमानी लढत
कणकवली मतदारसंघात ९५% जागा बिनविरोध झाल्या असल्या तरी, कुडाळ-मालवणमधील ठाकरे सेनेचे उमेदवार धनशक्तीला किंवा दबावाला बळी पडले नाहीत. आमचे उमेदवार ठाम असून आम्ही ही निवडणूक पूर्ण ताकदीने लढणार असल्याचे नाईक यांनी स्पष्ट केले.
यावेळी तालुका प्रमुख राजन नाईक, युवा सेना जिल्हा प्रमुख मंदार शिरसाट, संतोष शिरसाट, बबन बोभाटे आदी पदाधिकारी उपस्थित होते.

 सैनिक नागरी सहकारी पतसंस्थेच्या वतीने अजितदादांना भावपूर्ण श्रद्धांजली

सावंतवाडी दि.०२: महाराष्ट्र राज्याचे उपमुख्यमंत्री स्व. अजित पवार यांच्या आकस्मिक आणि दुःखद निधनामुळे संपूर्ण सहकार क्षेत्रात मोठी पोकळी निर्माण झाली असून, सर्वत्र शोककळा पसरली आहे. या पार्श्वभूमीवर, सैनिक नागरी सहकारी पतसंस्था मर्यादित, सिंधुदुर्ग यांच्या वतीने सावंतवाडी येथील प्रधान कार्यालयात श्रद्धांजली सभेचे आयोजन करण्यात आले होते.
‘घड्याळाच्या काट्याला वेग देणारे नेतृत्व’
श्रद्धांजली अर्पण करताना संस्थेच्या वतीने सांगण्यात आले की, अजितदादा हे केवळ एक नेते नव्हते तर सहकार क्षेत्राचे आधारस्तंभ होते. महाराष्ट्राच्या सहकार चळवळीला प्रगत आणि आधुनिक बनवण्यात त्यांचा मोलाचा वाटा होता. “घड्याळाच्या काट्याप्रमाणे काम न करता, आपल्या कार्यकर्तृत्वाने घड्याळाच्या काट्याला देखील वेग देणारे नेतृत्व” अशी त्यांची ख्याती होती. त्यांच्या या शिस्तबद्ध कार्यपद्धतीचा आणि योगदानाचा वारसा सहकार क्षेत्राला सदैव प्रेरणा देत राहील.

भोगटे प्लाझा, गवळी तिठा येथील प्रधान कार्यालयात आयोजित या शोकसभेला संस्थेचे सर्व प्रमुख पदाधिकारी उपस्थित होते. यामध्ये प्रामुख्याने:
चेअरमन: श्री. बाबूराव कविटकर
व्हा. चेअरमन: श्री. चंद्रकांत शिरसाट
संचालक: श्री. दिनानाथ सावंत, श्री. सुभाष सावंत, श्री. भिवा गावडे, श्री. श्यामसुंदर सावंत, श्री. चंद्रशेखर जोशी, श्री. संतोष मुसळे, श्री. बाबू वरक, श्री. शांताराम पवार.
मुख्य कार्यकारी अधिकारी: श्री. सुनील राऊळ
याप्रसंगी संस्थेचे सर्व अधिकारी आणि कर्मचारी वर्ग मोठ्या संख्येने उपस्थित होता. सर्वांनी दोन मिनिटे मौन पाळून आपल्या लाडक्या नेत्याला भावपूर्ण श्रद्धांजली अर्पण केली. अजितदादांच्या जाण्याने सहकार क्षेत्राचे कधीही न भरून येणारे नुकसान झाले असल्याची भावना यावेळी व्यक्त करण्यात आली.

कोलगाव जिल्हा परिषद मतदारसंघात महेश सारंग यांचा विकासाचा ठाम अजेंडा

सावंतवाडी दि.०२:
सावंतवाडी शहराच्या अगदी हाकेच्या अंतरावर असलेले कोलगाव गाव शहरालगत असल्याने विकासाच्या मुख्य प्रवाहात यावे, ही येथील प्रत्येक नागरिकाची अपेक्षा आहे. मात्र हा विकासाचा भार कोण समर्थपणे पेलू शकतो, असा प्रश्न निर्माण होताच महेश सारंग हे नाव आपसूकच पुढे येते.
महेश सारंग यांची राजकीय कारकीर्द सरपंच पदापासून सुरू झाली. सरपंचपदाच्या कार्यकाळात त्यांनी अनेक धाडसी आणि लोकाभिमुख निर्णय घेत आपल्या नेतृत्वाची ठळक छाप उमटवली. त्यानंतर त्यांनी कधीही मागे वळून पाहिले नाही. त्यांच्या राजकीय वाटचालीत मातोश्री वृंदा सारंग यांनी सावलीसारखे सोबत राहून त्यांना बळ दिले.
जीवनात आलेल्या अनेक कटू प्रसंगांवर मात करत महेश सारंग यांनी संयम आणि चिकाटीने पुढे वाटचाल केली. त्यांच्यावर झालेले आरोप व टीकांना त्यांनी शब्दांनी नव्हे, तर ठोस विकासकामांच्या माध्यमातून उत्तर दिले. ही कामे इतकी प्रभावी ठरली की विरोधक वेळोवेळी चितपट होत गेले.
आज कोलगाव, कुणकेरी, आंबेगाव व कारिवडे या गावांचा समावेश असलेल्या जिल्हा परिषद मतदारसंघातून महेश सारंग हे भाजप, शिवसेना (शिंदे गट), राष्ट्रवादी काँग्रेस (अजित पवार गट) व इतर घटक पक्षांच्या महायुतीचे अधिकृत उमेदवार आहेत. निवडणुकीच्या पार्श्वभूमीवर विरोधकांकडून आरोपांची मालिका सुरू असली तरी महेश सारंग मात्र त्यावर कोणतीही प्रतिक्रिया न देता शांतपणे विकासकामांवर भर देताना दिसत आहेत.
“माझा एकमेव मुद्दा हा मतदारसंघाचा सर्वांगीण विकास आहे,” असे ते ठामपणे सांगतात. रस्ते, पाणी, वीज, सामाजिक व शैक्षणिक प्रश्नांवर सातत्याने आवाज उठवणारे नेतृत्व म्हणून त्यांची ओळख आहे. मतदारसंघातील वाडी-वाडीपर्यंत पोहोचलेले रस्ते, पाणीपुरवठा आणि वीज व्यवस्था ही त्यांच्या कामांची पोचपावती ठरत आहेत.
घरकुल योजनांच्या बाबतीत जिल्ह्यात त्यांचे नाव आदराने घेतले जाते. त्यांनी मंजूर करून आणलेली घरकुले ही विरोधकांच्या गणिताच्या कितीतरी पटीने अधिक असल्याचे बोलले जाते. तसेच युवकांना स्वावलंबी करण्याच्या उद्देशाने जिल्हा बँकेच्या माध्यमातून अनेक युवकांना आर्थिक सहाय्य मिळवून देण्यात त्यांनी महत्त्वाची भूमिका बजावली आहे.
“युवा हे देशाचे भविष्य आहेत. त्यांनी उद्योग-व्यवसायाच्या माध्यमातून स्वतःचा आणि देशाचा विकास करावा,” ही त्यांची प्रामाणिक भूमिका आहे. रात्री-अपरात्री नागरिकांच्या मदतीला धावून जाणारा, ऊन-पावसाची तमा न बाळगता काम करणारा, केवळ बोलणारा नव्हे तर करून दाखवणारा नेता म्हणून महेश सारंग यांची ओळख निर्माण झाली आहे.
विरोधकांकडे विकासाचा ठोस मुद्दा नसल्याने केवळ विरोधाला विरोध सुरू असल्याची चर्चा असली, तरी महेश सारंग हे विकासाच्या जोरावर निवडणुकीला सामोरे जात आहेत. जनतेचा आशीर्वाद त्यांच्या पाठीशी असल्याने कोलगाव जिल्हा परिषद मतदारसंघातून त्यांचा विजय निश्चित असल्याचा सूर सर्वत्र ऐकू येत आहे.
म्हणूनच आज सर्वत्र एकच चर्चा —
“तो लढतोय केवळ विकासासाठी…!”

घोषणांचा पाऊस… विकासाचा दुष्काळ! रेल्वे टर्मिनसचे काम नक्की कधी?
२०१५ ची घोषणा, २०१९ चे भूमिपूजन… २०२६ उजाडले तरी ‘जैसे थे”!

नुकत्याच झालेल्या अर्थसंकल्पात रेल्वेला २.८१ लाख कोटी मिळाले, पण आपल्या सावंतवाडीच्या वाट्याला काय? ❌ २०१५ पासून फक्त घोषणा! ❌ २०१९ ला झालेले भूमिपूजन हवेतच! ❌ पाणीपुरवठा आणि प्लॅटफॉर्मचे काम आजही अधांतरी!
आता वेळ आली आहे जाब विचारण्याची… आम्हाला आश्वासने नको, ‘परिपूर्ण कोचिंग टर्मिनस’ हवे! ✊
——————–++++++++++

‘मत हवे तर टर्मिनस द्या!’; सावंतवाडी रेल्वे स्थानकाच्या दुरावस्थेवरून जनतेचा संताप
घोषणांचा पाऊस, पण विकासाचा दुष्काळ; जागरूक सावंतवाडीकरांचा लोकप्रतिनिधींना थेट इशारा

सावंतवाडी दि.०२: गेल्या अनेक वर्षांपासून केवळ घोषणांच्या भोवऱ्यात अडकलेल्या सावंतवाडी रेल्वे टर्मिनसचा प्रश्न आता चांगलाच तापू लागला आहे. “आता आश्वासने नकोत, प्रत्यक्ष काम दाखवा, अन्यथा मत मागायला येऊ नका,” अशा आक्रमक पवित्र्यात सावंतवाडीकर दिसत असून सोशल मीडियासह सर्वच स्तरांतून लोकप्रतिनिधींविरोधात संताप व्यक्त केला जात आहे.
घोषणांची ‘एक्स्प्रेस’ धावतेय, पण काम ‘शंटिंग’लाच!
सावंतवाडीच्या रेल्वे विकासाचे स्वप्न कागदावरच असल्याचे सांगत स्थानिकांनी पुराव्यांसह प्रशासनाचे वाभाडे काढले आहेत. यामध्ये प्रामुख्याने खालील मुद्दे उपस्थित करण्यात आले आहेत

हॉटेल प्रकल्पाचा फार्स: जून २०१५ मध्ये घोषणा झालेल्या आणि मे २०१९ मध्ये सुरेश प्रभू यांच्या हस्ते भूमिपूजन झालेल्या ‘रेलोटेल हॉटेल’चे काम अद्याप सुरू झालेले नाही. विशेष म्हणजे, फेब्रुवारी २०२५ मध्ये पुन्हा एकदा याच हॉटेलच्या बांधकामाची घोषणा झाली, ज्यामुळे “नक्की काम कधी होणार?” असा प्रश्न नागरिक विचारत आहेत.
तिलारीच्या पाण्याचा प्रश्न: टर्मिनससाठी अत्यावश्यक असलेल्या पाणीपुरवठ्याची निविदा प्रक्रिया नेकी कुठे अडकली आहे? याचे उत्तर आजही जनतेला मिळालेले नाही.
अपुऱ्या सुविधा: नवीन प्लॅटफॉर्म, रेल्वे रूळ आणि इतर तांत्रिक सुविधांच्या घोषणा केवळ पोकळ ठरल्याचा आरोप होत आहे.

‘जागरूक सावंतवाडीकर’ आक्रमक
“मत हवे तर टर्मिनस द्या,” हा नवा नारा आता सावंतवाडीत घुमू लागला आहे. विकासाच्या नावाखाली केवळ निवडणुकांपुरती आश्वासने देणाऱ्या नेत्यांना आता जनता जाब विचारत आहे. परिपूर्ण रेल्वे कोचिंग टर्मिनससाठी तातडीने निधी उपलब्ध करून कोकणच्या रेल्वे विकासाला गती द्यावी, अशी कळकळीची विनंती ‘जागरूक सावंतवाडीकर’ समूहाने केली आहे.

“विकासाचे स्वप्न आम्ही गेली अनेक वर्षे पाहत आहोत, पण १५ फेब्रुवारी २०२५ च्या संदर्भाप्रमाणे आजही परिस्थिती ‘जैसे थे’ आहे. आता आम्हाला केवळ कागदी प्रकल्प नकोत, तर जमिनीवर काम हवे आहे.” — सावंतवाडीचे स्थानिक नागरिक

दोडामार्ग दि.०२ : माटणे जिल्हा परिषद मतदारसंघातून शिवसेना उद्धव बाळासाहेब ठाकरे गटाचे जिल्हाप्रमुख श्री. बाबुराव धुरी यांनी निवडणूक रिंगणात उतरत प्रचाराला वेग दिला आहे. गावोगाव भेटी, नागरिकांशी थेट संवाद, बैठका तसेच प्रचार फेऱ्यांमुळे त्यांच्या प्रचाराला मतदारांकडून चांगला प्रतिसाद मिळताना दिसत आहे. संघटनात्मक कामात सक्रिय असलेले बाबुराव धुरी हे शिवसेनेचे निष्ठावंत कार्यकर्ते म्हणून ओळखले जातात. सामान्य नागरिकांच्या समस्या समजून घेऊन त्यावर तोडगा काढण्यासाठी ते सातत्याने प्रयत्नशील असतात. सामाजिक आणि सार्वजनिक कामातून त्यांची मतदारसंघात स्वतंत्र ओळख निर्माण झाली आहे. स्थानिक स्वराज्य संस्थांमधील अनुभव आणि संघटनात्मक बांधणीच्या जोरावर त्यांनी ग्रामीण विकासाशी संबंधित प्रश्नांवर लक्ष केंद्रित केले आहे. रस्ते, पाणीपुरवठा, आरोग्य सुविधा, शिक्षण, शेतकरी प्रश्न तसेच युवकांच्या रोजगार संधी यासारख्या विषयांवर त्यांनी प्रचारादरम्यान स्पष्ट भूमिका मांडली आहे.

प्रचारादरम्यान नागरिकांशी थेट संवाद साधत मतदारसंघातील समस्या समजून घेणे, प्रलंबित विकासकामांचा आढावा घेणे आणि पुढील नियोजनाबाबत नागरिकांशी चर्चा करण्यावर त्यांचा भर आहे. “जिल्हा परिषदेच्या माध्यमातून गावागावातील मूलभूत सुविधा सक्षम करणे हेच माझे प्राधान्य राहील,” असे बाबुराव धुरी यांनी सांगितले. सध्या मतदारसंघात विविध गावांमध्ये त्यांच्या प्रचार सभा, बैठका आणि जनसंवाद कार्यक्रम सुरू असून स्थानिक कार्यकर्त्यांमध्ये उत्साहाचे वातावरण आहे. आगामी काळात मतदारसंघातील विकासात्मक प्रश्नांवर केंद्रित प्रचार करत जनतेपर्यंत आपली भूमिका पोहोचवण्यावर भर राहणार असल्याचे त्यांनी स्पष्ट केले आहे.

पासपोर्ट फोटो बाबुराव धुरी

कणकवली दि.०१ जिल्हा परिषद निवडणुकांच्या तोंडावर सिंधुदुर्ग जिल्ह्याच्या राजकारणात मोठी उलथापालथ झाली आहे. ठाकरे शिवसेनेचे कणकवली विधानसभा प्रमुख आणि सहकार क्षेत्रातील दिग्गज नेते सतीश सावंत यांनी अखेर ‘मशाल’ सोडून भाजपचे ‘कमळ’ हाती घेतले आहे. हरकुळ बुद्रुक येथे पालकमंत्री नितेश राणे यांच्या उपस्थितीत हा भव्य प्रवेश सोहळा पार पडला.

राणे-सावंत पुन्हा एकत्र
सतीश सावंत हे एकेकाळी नारायण राणे यांचे अत्यंत कट्टर समर्थक आणि विश्वासू सहकारी म्हणून ओळखले जात होते. काही वर्षांपूर्वी त्यांनी राणेंची साथ सोडून शिवसेनेत (ठाकरे गट) प्रवेश केला होता. मात्र, आता पुन्हा एकदा त्यांनी भाजपमध्ये प्रवेश केल्याने याकडे राजकीय वर्तुळात ‘घरवापसी’ म्हणून पाहिले जात आहे.

शेकडो कार्यकर्त्यांचे शक्तीप्रदर्शन
केवळ सतीश सावंतच नव्हे, तर त्यांच्यासोबत कार्यकर्त्यांची मोठी फौज भाजपमध्ये सामील झाली आहे. यामध्ये प्रामुख्याने समावेश असलेले पदाधिकारी:नित्यानंद चिंदरकर (उपाध्यक्ष, हरकुळ खुर्द सोसायटी),बाळा सावंत (माजी सरपंच),संदीप रासम
१५० हून अधिक प्रमुख पदाधिकारी आणि शेकडो कार्यकर्ते.

राजकीय परिणाम: ठाकरे गटाची अडचण, भाजपचे बळ
सावंत यांच्या पक्षबदलामुळे कणकवली मतदारसंघात ठाकरे गटाची मोठी पडझड झाली आहे. याचे प्रामुख्याने दोन स्तरांवर परिणाम दिसून येतील:

सहकार क्षेत्र: सतीश सावंत यांचा जिल्हा बँक आणि ग्रामीण विकास सोसायट्यांवर मोठा प्रभाव आहे. त्यांच्या प्रवेशामुळे भाजपचे सहकार क्षेत्रातील वर्चस्व आता अधिक घट्ट होणार आहे.

स्थानिक स्वराज्य संस्था: आगामी जिल्हा परिषद आणि पंचायत समिती निवडणुकांमध्ये भाजपला सतीश सावंतांच्या अनुभवाचा आणि दांडग्या जनसंपर्काचा मोठा फायदा मिळण्याची शक्यता आहे.

“जुन्या सहकाऱ्याचे परतणे हे भाजपची ताकद वाढवणारे आहे. कोकणच्या विकासासाठी आम्ही सर्व एकत्र आलो आहोत,” असे मत यावेळी पालकमंत्री नितेश राणे यांनी व्यक्त केले.

मायकल डिसोजा यांचा सत्ताधाऱ्यांना खणखणीत इशारा

सावंतवाडी दि.०१: कोलगाव जिल्हा परिषद मतदारसंघात सध्या सुरू असलेली सत्ताधाऱ्यांची हुकूमशाही आणि घराणेशाही आता संपुष्टात येईल. सत्तेचा अहंकार झालेल्यांचा भ्रमाचा भोपळा येत्या ७ तारखेला जनताच फोडेल, असा घणाघाती प्रहार मायकल डिसोजा यांनी केला आहे. कोलगाव येथील निवडणूक प्रचार कार्यालयाच्या उद्घाटनप्रसंगी ते बोलत होते.

घराणेशाही आणि सत्तेच्या गैरवापरावर प्रहार
निवडणुकीच्या रिंगणात उतरलेले मायकल डिसोजा यांनी सत्ताधाऱ्यांच्या कार्यपद्धतीवर गंभीर आरोप केले आहेत.

कर्मचाऱ्यांचा राजकीय वापर: जिल्हा बँक आणि ग्रामपंचायत कर्मचाऱ्यांचा स्वतःच्या राजकीय फायद्यासाठी वापर केला जात असून, ही लोकशाहीसाठी घातक असलेली हुकूमशाही आहे.

घराणेशाहीवर निशाणा: “सध्या सर्वच पदे एकाच घरात एकवटली आहेत, अजून किती पदे यांना हवी आहेत?” असा सवाल करत त्यांनी सत्तेच्या केंद्रीकरणावर टीका केली.

परिवर्तनाचा निर्धार: सत्तेचा गैरवापर करणाऱ्यांना ही निवडणूक महाग पडणार असून, जिल्हा परिषदेवर जाण्याचे सत्ताधाऱ्यांचे स्वप्न अधुरेच राहील, असा विश्वास त्यांनी व्यक्त केला.

“सत्तेचा अहंकार झालेल्यांना धडा शिकवण्यासाठी आता सामान्य जनता सज्ज झाली आहे. कार्यकर्त्यांनी घरोघरी जाऊन जनतेचा आशीर्वाद घ्यावा, परिवर्तनाची लाट आता थोपवता येणार नाही.” — मायकल डिसोजा

प्रचाराला उत्स्फूर्त प्रतिसाद
कोलगाव मतदारसंघात मायकल डिसोजा यांच्या घरोघरी सुरू असलेल्या प्रचाराला मतदारांकडून मोठा प्रतिसाद मिळत आहे. सत्तेच्या गैरवापराविरुद्ध जनमानसात असलेला रोष पाहता, या मतदारसंघात मोठ्या राजकीय उलथापालथीची शक्यता वर्तवली जात आहे. डिसोजा यांनी फुंकलेल्या या ‘परिवर्तनाच्या रणशिंगामुळे’ निवडणुकीचे रणांगण आता चांगलेच तापले आहे.