मुंबई दि.११ मुख्य निवडणूक आयुक्त ज्ञानेश कुमार यांच्या विरोधात आणि सीजेपीच्या समर्थनार्थ युवा सेनेच्या वतीने मुंबईत आंदोलनाची हाक देण्यात आली होती. ज्ञानेश कुमार यांच्या राजीनाम्याच्या मागणीसाठी ठाकरेंची नवी पिढी रस्त्यावर उतरली असून केंद्र सरकारवर जोरदार टीका करण्यात आली आहे. मुंबई पोलिसांनी दिल्ली पोलिसांसारखी दडपशाही चालवली असून केंद्र सरकारला लाज वाटली पाहिजे, असा संतप्त सूर यावेळी आळवण्यात आला. भाजपा देश अशांत करण्याचा प्रयत्न करत असल्याची टीका आदित्य ठाकरे यांनी केली आहे. यावेळी “वोट चोर गद्दी छोड” अशा प्रकारच्या घोषणा देण्यात आल्या.

आदित्य ठाकरेंचा आक्रमक पवित्रा आणि पोलिसांची धरपकड

आंदोलनादरम्यान पोलिसांनी सीजेपी आणि आंदोलक कार्यकर्त्यांची धरपकड सुरू केली. कार्यकर्त्यांना ताब्यात घेण्यासाठी आलेल्या पोलिसांच्या व्हॅनसमोर खुद्द आमदार आदित्य ठाकरे स्वतः येऊन उभे राहिले आणि त्यांनी पोलिसांची व्हॅन अडवून धरली. तसेच सर्व कार्यकर्त्यांना पोलिसांच्या व्हॅनभोवती जमण्याच्या आणि व्हॅन अडवण्याच्या सूचना त्यांनी दिल्या. पोलिसांच्या कारवाईला न जुमानता आदित्य ठाकरे यांनी आंदोलकांना सुरक्षितपणे बाहेर काढण्यात यश मिळवले.
ठाकरे आणि मनसेची राजकीय ‘एकजूट’
या आंदोलनाचे विशेष आकर्षण म्हणजे यामध्ये ठाकरे कुटुंबीयांसह मनसेचे नेतेही मोठ्या प्रमाणावर सहभागी झाले होते. ठाकरेंच्या युवा पिढीसोबत मनसेचे नेते अमित ठाकरे, तसेच तेजस ठाकरे, शिवसेनेचे आमदार महेश सावंत, अनिल परब आणि मनसेचे ज्येष्ठ नेते व संदीप देशपांडे (ज्यांना पोलिसांनी अटक केली) हे देखील या आंदोलनात खांद्याला खांदा लावून उतरले होते. पोलिसांनी मनसे नेते संदीप देशपांडे यांच्यासह काही कार्यकर्त्यांना अटक केली.
शिवसेना भवनाबाहेर छावणीचे स्वरूप आणि कडक बंदोबस्त
आंदोलनाच्या पार्श्वभूमीवर शिवसेना भवनाबाहेर मोठा पोलीस बंदोबस्त तैनात करण्यात आला असून, संपूर्ण परिसަރाला छावणीचे स्वरूप आले आहे. प्रवेशद्वारावर ठाकरे कुटुंबीयांच्या युवा पिढीसह ज्येष्ठ शिवसैनिक आणि महिला मोठ्या संख्येने उभे ठाकले आहेत.

दरम्यान, आदित्य ठाकरे यांनी CJP समर्थकांना हात लावाल तर आंदोलन असेच सुरूच राहील, असा स्पष्ट इशारा दिला असून सर्व सीजेपी जनता पार्टीच्या कार्यकर्त्यांना शिवाजी पार्कमध्ये जमण्याचे आवाहन केले आहे.

सावंतवाडी दि.०९: सावंतवाडी नगरपरिषदेच्या पाणीपुरवठा विभागातील आर्थिक गैरव्यवहार आणि महत्त्वाचे रजिस्टर गहाळ प्रकरणाला आता अत्यंत नाट्यमय वळण मिळाले आहे. या प्रकरणात गुन्हा दाखल झालेला आणि गेल्या काही दिवसांपासून फरार असलेला पालिकेचा जोडारी (फिटर) भारत लाखे याने सोशल मीडियावर एक व्हिडिओ व्हायरल करत थेट पाणीपुरवठा सभापती प्रतीक बांदेकर यांच्यावरच गंभीर आरोप केले आहेत. इतकेच नव्हे तर, न्याय न मिळाल्यास आत्महत्येचा इशाराही त्याने दिला. या खळबळजनक प्रकारामुळे सावंतवाडीच्या राजकीय व सामाजिक वर्तुळात प्रचंड खळबळ उडाली असून, या गंभीर आरोपांच्या पार्श्वभूमीवर अखेर सभापती प्रतीक बांदेकर यांनी आपल्या पदाचा राजीनामा दिला आहे. आज होणाऱ्या पालिकेच्या मासिक सर्वसाधारण सभेपूर्वीच हा राजीनामा देण्यात आल्याने पालिकेची आजची सभा प्रचंड वादळी ठरणार असल्याचे स्पष्ट होत आहे.
सावंतवाडी पालिकेच्या पाणीपुरवठा विभागात मोठा आर्थिक घोटाळा झाल्याचे आरोप गेल्या काही दिवसांपासून होत होते. त्यातच पालिकेकडून देण्यात आलेल्या तक्रारीवरून महत्त्वाचे रजिस्टर गहाळ केल्याप्रकरणी फिटर भारत लाखे याच्यावर गुन्हा दाखल करण्यात आला होता. गुन्हा दाखल झाल्यापासून फरार असलेल्या लाखेने अचानक थेट सोशल मीडियावरून व्हिडिओ जारी केला. या व्हिडिओत त्याने थेट पाणीपुरवठा सभापती प्रतीक बांदेकर यांच्यावर निशाणा साधत गंभीर आरोप केले आणि आपल्याला न्याय न मिळाल्यास आत्महत्या करण्याचा इशारा दिला. या प्रकारानंतर तो पोलिसांत हजर झाला.
या खळबळजनक घडामोडींमुळे शहरात तर्कवितर्कांना उधाण आले असून पाणीपुरवठा विभागातील या गंभीर वादामुळे सावंतवाडीचे राजकीय वातावरण चांगलेच तापले आहे. या संपूर्ण प्रकाराचे तीव्र पडसाद आज होणाऱ्या नगरपरिषदेच्या सर्वसाधारण सभेत उमटण्याची दाट शक्यता वर्तवली जात आहे. सभापती प्रतीक बांदेकर यांनी आपल्या पदाचा राजीनामा दिल्यानंतर आता आजच्या सभेत याप्रकरणी काय चर्चा होते आणि नेमकी काय कारवाई केली जाते, याकडे संपूर्ण सावंतवाडी नगरवासीयांचे लक्ष लागून राहिले आहे.