सावंतवाडी दि. ०६: येथील पालिकेच्या माजी नगरसेविका तथा भाजपच्या शहराध्यक्ष मोहिनी मडगावकर यांनी आपल्या शहराध्यक्ष पदाचा तडकाफडकी राजीनामा दिल्याने स्थानिक भाजप वर्तुळात प्रचंड खळबळ उडाली आहे. पक्षातील काही पदाधिकाऱ्यांकडून सातत्याने अंतर्गत कुरघोडी केली जात असून, पक्ष बैठकीत आपला अपमान करण्यात आल्याची भावना व्यक्त करत त्यांनी हा टोकाचा निर्णय घेतला आहे. आज आयोजित एका जाहीर पत्रकार परिषदेत बोलताना मडगावकर यांनी पक्षांतर्गत राजकारणावर तीव्र नाराजी व्यक्त करत थेट बॉम्बगोळा टाकला.

“तो सूत्रधार कोलगावचा; महिला जिल्हाध्यक्षा त्यांना का घाबरतात?”
पत्रकार परिषदेत बोलताना मोहिनी मडगावकर यांनी पक्षातील काही व्यक्तींवर थेट निशाणा साधला. विशेषतः कोलगावातील एका पदाधिकाऱ्यामुळे आपल्यावर मोठा अन्याय होत असल्याचा थेट आरोप त्यांनी केला. “तो सूत्रधार कोलगावचा आहे,” असा उल्लेख करत मडगावकर यांनी खळबळ उडवून दिली. पुढे बोलताना त्या म्हणाल्या, “पक्ष संघटनेत काम करत असताना सहकार्याऐवजी वारंवार अडथळे निर्माण केले जात आहेत. या संपूर्ण प्रकाराबाबत आणि संबंधित पदाधिकाऱ्याच्या कार्यपद्धतीबाबत मी भाजप महिला जिल्हाध्यक्ष श्वेता कोरगावकर यांच्यासमोरही माझी नाराजी व्यक्त केली होती. मात्र, महिला जिल्हाध्यक्षा तरी त्यांना एवढ्या का घाबरतात?” असा रोकडा सवालही मडगावकर यांनी यावेळी उपस्थित केला.

बाहेरच्या मंडळींची शहरात ढवळाढवळ!
पक्षाच्या कार्यपद्धतीवर प्रश्नचिन्ह उपस्थित करताना मडगावकर म्हणाल्या की, “माझा शहराध्यक्ष पदाचा कार्यकाळ पूर्ण होण्यापूर्वीच मला पद सोडण्यासाठी सातत्याने दबाव आणला जात आहे. संपूर्ण जिल्ह्यातील कार्यकारणी न बदलता केवळ सावंतवाडीतच अशी ढवळाढवळ का केली जात आहे? जिल्ह्याचे सरचिटणीस इतरत्र कुठेही न जाता फक्त सावंतवाडीतच वारंवार बैठका का घेतात? बाहेरची मंडळी शहरात येऊन नाहक ढवळाढवळ करत आहेत.” पक्षात महिला पदाधिकाऱ्याला सन्मानाची वागणूक मिळत नसल्यामुळेच अखेर आपण शहराध्यक्ष पदाचा राजीनामा देण्याचा निर्णय घेतल्याचे त्यांनी स्पष्ट केले. तसेच, आपल्या या निर्णयानंतर शहरातील कार्यकारणीतील इतर पदाधिकारी देखील आपल्या पदाचा राजीनामा देतील, असा इशाराही त्यांनी दिला.

नेत्यांवर विश्वास, नगरसेवक म्हणून काम सुरूच राहणार!
“मी आज राजीनामा देत असून पुन्हा कोणत्याही परिस्थितीत हे पद स्वीकारणार नाही. आज मी अत्यंत स्वाभिमानाने आणि सन्मानाने या पदावरून बाजूला होत आहे,” असे मडगावकर यांनी ठामपणे सांगितले. मात्र, आपला भाजप पक्षावर जीव आहे आणि पक्षावरील प्रेम कायम राहील, असे स्पष्ट करत त्या म्हणाल्या, “देशाचे नेते नारायण राणे, सार्वजनिक बांधकाम मंत्री रवींद्र चव्हाण आणि सिंधुदुर्गचे पालकमंत्री नितेश राणे हेच आमचे नेते असून त्यांच्याच मार्गदर्शनाखाली आम्ही यापुढेही पक्षात काम करत राहू. शहराध्यक्ष पद सोडले असले तरी नगरसेवक म्हणून मी लोकांची कामे करत राहीन आणि पक्षाची एक निष्ठावंत सदस्य म्हणून पक्षाचे काम करत राहीन.”

दरम्यान, मोहिनी मडगावकर यांच्या या तडकाफडकी राजीनाम्यामुळे आणि पत्रकार परिषदेतील थेट आरोपांमुळे सावंतवाडी भाजपमधील अंतर्गत मतभेद आणि गटबाजी पुन्हा एकदा चव्हाट्यावर आली आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर या राजीनामा सत्राचे तालुक्यात आणि जिल्ह्यात काय राजकीय पडसाद उमटतात, याकडे आता सर्वांचे लक्ष लागून राहिले आहे.

🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज*
🪐 *वेबसाईट* : hindustanlivenh@gmail.com
🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com
📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :
📱9422054887,8275659563

🚨 🚨सावंतवाडी दि.०६: सावंतवाडी तालुक्यातील वीज पुरवठ्याचा प्रश्न आता राजकीयदृष्ट्या कमालीचा तापला असून, यामध्ये आता ‘नेमळे’ गाव केंद्रस्थानी आले आहे. भाजपचे महाराष्ट्र प्रदेशाध्यक्ष व आमदार रवींद्र चव्हाण यांचे हे सासुरवाडीचे गाव, तर सावंतवाडी पंचायत समितीचे उपसभापती गौरव मुळीक हेही याच गावचे सुपुत्र! असे असूनही हे गाव विजेसाठी आजही वेंगुर्ला तालुक्याशी जोडलेले असल्याने ग्रामस्थांना मरणयातना सोसाव्या लागत आहेत. गाव सावंतवाडीत आणि वीज पुरवठा वेंगुर्ल्यातून, अशा विचित्र प्रशासकीय व्यवस्थेमुळे नेमळे, आजगाव, भोमवाडी, मळेवाड, कोंडुरे, सातार्डा, सातोसे, आरोस, पाडलोस अशा १५ ते १६ गावांची पुरती कोंडी झाली आहे.
याविरोधात ठाकरे शिवसेनेचे सावंतवाडी विधानसभा प्रमुख रुपेश राऊळ यांनी मळेवाड येथील गणपती मंदिरात महावितरणच्या अधिकाऱ्यांना सद्बुद्धी देण्यासाठी भजन करत उपरोधिक आंदोलनही छेडले होते, मात्र तरीही महावितरणच्या मुजोर अधिकाऱ्यांना अद्याप जाग आलेली नाही.
💸 १५-१६ गावांना वेंगुर्ल्याचा नाहक भुर्दंड आणि दुहेरी फटका!
भौगोलिकदृष्ट्या ही गावे सावंतवाडीत असूनही वीज तक्रारींसाठी ग्राहकांना मुद्दाम वेंगुर्ला मुख्यालय किंवा रेडी येथील कार्यालयात जावे लागते. महागाई आणि पेट्रोल-डिझेलच्या वाढत्या दरांमुळे मेटाकुटीला आलेल्या सर्वसामान्यांना या प्रवासासाठी नाहक वेळ आणि पैसा खर्च करावा लागत आहे. ही गावे तातडीने सावंतवाडी वीज कार्यालयाला जोडावीत, अशी मागणी आता जोर धरू लागली आहे.
📉 कमी दाबाचा पुरवठा; विद्युत उपकरणे निकामी!
सातार्डा, साटेली, मळेवाड, कोंडुरा भागात दर अर्ध्या-एक तासाने वीज गायब होणे ही ‘परंपराच’ बनली आहे. काल शुक्रवार (५ जून) रोजी रात्री तर तास-तासभर वीज खंडित होत होती. त्यातच अत्यंत कमी दाबाने (लो व्होल्टेज) वीज पुरवली जात असल्याने सततच्या ‘फ्लक्चुएशन’मुळे नागरिकांची महागडी विद्युत उपकरणे निकामी होत आहेत. कडक उन्हाळ्याच्या उकाड्याने ग्रामीण जनता हैराण झाली असताना, वायरमन मात्र “१५ मिनिटांत वीज येईल” अशी खोटी आश्वासने देऊन नागरिकांच्या जखमेवर मीठ चोळत आहेत.
📌 सावंतवाडी पंचायत समितीत वेंगुर्ला महावितरणचे अभियंता का नाहीत?
पंचायत समितीच्या मासिक बैठकीत सार्वजनिक बांधकाम, शिक्षण, पाणीपुरवठा अशा सर्व विभागांचे अधिकारी उपस्थित राहून लोकप्रतिनिधींच्या प्रश्नांना उत्तरे देतात. सावंतवाडी वीज महावितरणचे अधिकारीही या बैठकीला येतात. मात्र, सावंतवाडी तालुक्यातीलच १५ ते १६ गावे जोडलेल्या वेंगुर्ला वीज महावितरणच्या उपअभियंत्यांना या बैठकीचे निमंत्रण का दिले जात नाही? त्यांनाही या बैठकीला उपस्थित राहण्याबाबत रितसर पत्रव्यवहार करून उपकृत करण्याची गरज आता व्यक्त होत आहे.
वादळ नसतानाही वीज गुल; महावितरणचे स्पष्टीकरण शून्य!
सध्या परिसरात किरकोळ अवकाळी पाऊस सुरू असला, तरी कोणत्याही वादळी वाऱ्याचा प्रादुर्भाव नसतानाही महावितरणकडून वीज पुरवठा तासनतास खंडित केला जातो. यावर महावितरण कंपनीकडून कोणतेही अधिकृत स्पष्टीकरण दिले जात नसल्याने ग्राहकांमध्ये तीव्र संताप आहे.
आमदार रवींद्र चव्हाण यांच्यामध्ये कोणताही प्रश्न चुटकीसरशी सोडवण्याची राजकीय क्षमता असताना, महावितरणच्या या जाचक त्रासातून हक्काच्या मतदारांची मुक्तता का केली जात नाही? असा रोकडा सवाल आता जनतेतून विचारला जात आहे.

🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज*
🪐 *वेबसाईट* : hindustanlivenh@gmail.com
🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com
📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :
📱9422054887,8275659563

चंद्रपूर दि.०५ : चंद्रपूर-वर्धा-गडचिरोली स्थानिक स्वराज्य संस्था मतदारसंघाच्या विधान परिषद निवडणुकीत अत्यंत नाट्यमय घडामोडी समोर आल्या आहेत. काँग्रेसचे अधिकृत उमेदवार शैलेश अग्रवाल यांनी पक्ष नेतृत्वाला कोणतीही पूर्वकल्पना न देता अचानक आपली उमेदवारी मागे घेतली. या धक्कादायक निर्णयामुळे राजकीय वर्तुळात खळबळ उडाली असून, महाराष्ट्र प्रदेश काँग्रेस कमिटीने (MPCC) अग्रवाल यांच्यावर कठोर शिस्तभंगविषयक कारवाई केली आहे. त्यांचे पक्ष सदस्यत्व तातडीने रद्द करत त्यांना पक्षातून निलंबित करण्यात आले आहे.

पक्ष नेतृत्वाला अंधारात ठेवून माघार; काँग्रेसची कठोर कारवाई
महाराष्ट्र प्रदेश काँग्रेस कमिटीचे प्रदेशाध्यक्ष हर्षवर्धन सपकाळ यांच्या आदेशानुसार ही कारवाई करण्यात आली आहे. काँग्रेसचे वरिष्ठ उपाध्यक्ष अॅड. गणेश पाटील यांनी जारी केलेल्या पत्रात नमूद केले आहे की, शैलेश अग्रवाल यांच्या स्वतःच्या विनंतीवरूनच पक्षाने त्यांना या निवडणुकीत अधिकृत उमेदवारी (एबी फॉर्म) दिली होती. महायुतीविरोधात तगडे आव्हान उभे करण्यासाठी पक्षाने त्यांच्यावर विश्वास दाखवला होता.

परंतु, नामांकन मागे घेण्याच्या अंतिम दिवशी त्यांनी पक्षाच्या कोणत्याही स्थानिक किंवा राज्य पातळीवरील नेत्याला विश्वासात न घेता थेट जिल्हाधिकारी कार्यालयात जाऊन अर्ज मागे घेतला. त्यांच्या या अनपेक्षित आणि शिस्तबाह्य कृतीमुळे पक्षाची मोठी राजकीय कोंडी झाली असून ही बाब अत्यंत गंभीर आणि चुकीची मानत काँग्रेसने त्यांचे थेट सदस्यत्वच रद्द केले.

शैलेश अग्रवाल यांचे गंभीर आरोप
उमेदवारी अर्ज मागे घेतल्यानंतर पत्रकारांशी बोलताना शैलेश अग्रवाल यांनी एकच खळबळ उडवून दिली. त्यांनी सांगितले की, “निवडणुकीत विजयासाठी आवश्यक असणारे संख्याबळ आमच्याकडे अपुरे होते. एवढेच नव्हे तर, काही काँग्रेस नेतेच थेट भाजपशी संगनमत करून मतदारांमध्ये पैशांचे वाटप करत होते.” स्थानिक काँग्रेस नेत्यांकडून अपेक्षित पाठिंबा मिळत नसल्याने आणि निवडणुकीतील पैशांच्या वाढत्या वापरामुळे आपण हा निर्णय घेतल्याचा दावा त्यांनी केला. त्यांच्या या थेट आरोपांमुळे काँग्रेसमधील अंतर्गत गटबाजी आणि मतभेद पुन्हा एकदा चव्हाट्यावर आले आहेत.

महायुतीचे अरुण लखानी अविरोध विजयी
या निवडणुकीत काँग्रेसचे शैलेश अग्रवाल यांच्या माघारीनंतर अपक्ष उमेदवार सुधीर कोठारी यांनीही आपला अर्ज मागे घेतला. दोन्ही प्रमुख उमेदवारांनी अचानक माघार घेतल्यामुळे निवडणुकीतील सर्वच चित्र पालटले. परिणामी, महायुतीचे (भाजप) अधिकृत उमेदवार अरुण लखानी यांच्या अविरोध निवडीचा मार्ग मोकळा झाला असून त्यांची बिनविरोध निवड निश्चित झाली आहे. भाजपची ही व्यूहरचना यशस्वी ठरल्याचे मानले जात आहे.

काँग्रेसच्या अडचणीत वाढ
अग्रवाल यांच्या या बंडखोर पवित्र्यामुळे आणि त्यानंतर झालेल्या निलंबनाच्या कारवाईमुळे राज्याच्या राजकीय वर्तुळात जोरदार चर्चा सुरू आहे. ऐन निवडणुकीच्या तोंडावर अधिकृत उमेदवारानेच माघार घेतल्याने काँग्रेसच्या स्थानिक तसेच राज्य नेतृत्वाला मोठा धक्का बसला आहे. आगामी स्थानिक स्वराज्य संस्था आणि इतर महत्त्वपूर्ण निवडणुकांच्या पार्श्वभूमीवर काँग्रेस समोरील अंतर्गत आव्हानं आणि संघटनात्मक स्थिती यावर आता मोठे प्रश्नचिन्ह निर्माण झाले आहे.

🛑/——–/——-/—–/🛑——🛑–/——-/
*अधिक माहितीसाठी खालील लिंक पहा* akhandhindustanlive.com —————-◾ *अखंड हिंदुस्तान लाईव्ह न्यूज*
🪐 *वेबसाईट* : hindustanlivenh@gmail.com
🪀 *आमच्या Whatsapp ग्रुपमध्ये पुढील लिंक वर क्लिक करून सामील व्हा* https://akhandhindustanlive.com
📹 *व्हिडिओ ला like, share आणि चॅनलला subscribe जरूर करा* *बातम्या आणि जाहिरातींसाठी* संपर्क :
📱9422054887,8275659563