सिंधुदुर्ग दि.०६(प्रतिनिधी): जिल्ह्यातील आयनल (ता. कणकवली) येथील ३८ वर्षीय शिक्षणसेवक प्रशांत गंगाराम तांबे यांच्या दुर्दैवी निधनाने संपूर्ण शिक्षण क्षेत्रात शोककळा पसरली आहे. मात्र, या निधनाने शिक्षणसेवक या पदाच्या नावाखाली सुरू असलेल्या शोषणाचा आणि व्यवस्थेच्या असंवेदनशीलतेचा प्रश्न पुन्हा एकदा ऐरणीवर आला आहे. “जिवंतपणी संघर्ष आणि मृत्यूनंतर उपेक्षा” अशीच काहीशी अवस्था आज शिक्षणसेवकांची झाली आहे.
संघर्ष, जिद्द आणि नियतीचा निर्दयी खेळ महाळुंगे राणेवाडी (ता. देवगड) येथील शाळेत कार्यरत असलेले प्रशांत तांबे हे अत्यंत प्रामाणिक आणि प्रेमळ स्वभावाचे शिक्षक होते. तब्बल १४ वर्षे नोकरीसाठी संघर्ष केल्यानंतर ‘पवित्र पोर्टल’च्या माध्यमातून त्यांची शिक्षक म्हणून निवड झाली होती. घरची परिस्थिती अत्यंत हलाखीची होती. वडील पॅरालिसिसने अंथरुणाला खिळलेले, आई सतत आजारी, तर पत्नी कुटुंबाचा उदरनिर्वाह करण्यासाठी एका कपड्यांच्या दुकानात काम करत होती. अशा परिस्थितीत तांबे हे कुटुंबाचा एकमेव आधार होते.
उपचारादरम्यान मृत्यू आणि व्यवस्थेचे अपयश २८ मार्च रोजी ओरोस येथील शैक्षणिक महोत्सवातून परतल्यानंतर त्यांना ताप आणि चक्कर येऊ लागली. प्लेटलेट्स कमी झाल्यामुळे त्यांना आर्थिक अडचणीपोटी सरकारी रुग्णालयात हलवण्यात आले. मात्र, प्रकृती अधिक खालावल्याने पुढील उपचारासाठी गोवा येथे नेत असताना, ४ एप्रिल रोजी दुपारी रुग्णवाहिकेतच त्यांची प्राणज्योत मालवली. तांबे यांची नियमित सेवा सुरू होण्यासाठी केवळ एक वर्ष शिल्लक होते, मात्र नियतीने त्यापूर्वीच घाला घातला.
तुटपुंजे मानधन आणि शून्य संरक्षण प्रशांत तांबे यांना शिक्षणसेवक म्हणून केवळ १५,७९९ रुपये मानधन मिळत होते. आज त्यांच्या पश्चात पत्नी, वृद्ध आई-वडील आणि विवाहित बहीण असा परिवार उघड्यावर आला आहे. शिक्षणसेवक कालावधीत कोणतेही सेवा संरक्षण नसल्याने, त्यांच्या कुटुंबाला ना शासनाची मदत मिळणार, ना अनुकंपा तत्त्वावर नोकरी. सिंधुदुर्ग जिल्ह्यातील शिक्षणसेवकाच्या मृत्यूची ही पाचवी घटना आहे, तरीही शासन याकडे गांभीर्याने पाहत नसल्याने शिक्षक वर्गातून संताप व्यक्त होत आहे.
प्रमुख मागण्या:
शिक्षणसेवक पद तात्काळ रद्द करून शिक्षकांना नियमित सेवा द्यावी.
किमान बेसिक वेतन आणि सर्व सेवा संरक्षण लागू करावे.
मृत शिक्षणसेवकांच्या कुटुंबाला आर्थिक मदत व अनुकंपा नोकरी द्यावी.
चौकट
“शिक्षणसेवक हा देखील शिक्षकच आहे, मग त्याला मिळणारी वागणूक दुय्यम का? प्रशांत तांबे यांच्यासारखा प्रामाणिक शिक्षक जातो, पण त्याच्या कुटुंबासाठी शासनाकडे कोणतीही ठोस तरतूद नाही, ही अत्यंत वेदनादायक आणि संवेदनशून्य बाब आहे. शिक्षणसेवक ही संकल्पना आता संपवण्याची वेळ आली आहे. शासनाने आता तरी जागे होऊन ठोस निर्णय घ्यावा.” — जावेद तांबोळी (प्रसिद्धी प्रमुख, महाराष्ट्र राज्य प्राथमिक शिक्षक समिती)
सावंतवाडी दि.०५:दोन दुचाकी समोरासमोर झालेल्या अपघातात दोघे दुचाकीस्वार गंभीर जखमी झाले.
सावंतवाडी,दि.०५: निरवडे ग्रामस्थ आणि श्री देव महापुरुष कला क्रीडा मंडळ यांच्या संयुक्त विद्यमाने आयोजित करण्यात आलेला ‘निरवडे महोत्सव २०२६’ अत्यंत उत्साहात आणि दिमाखात पार पडला. दोन दिवस चाललेल्या या महोत्सवात राजकीय, सामाजिक आणि सांस्कृतिक क्षेत्रातील दिग्गजांनी हजेरी लावत ग्रामीण भागातील या कलाविष्काराचे आणि मंडळाच्या भव्य नियोजनाचे तोंडभरून कौतुक केले.
सावंतवाडी दि.०५: शहरातील पी.एम. श्री कै. सौ. सुधाताई वामनराव कामत विद्यामंदिर (शाळा नं. २) या शाळेने शैक्षणिक क्षेत्रात जिल्ह्याचा डंका वाजवला आहे. ध्येय एज्युकेशन फाऊंडेशन, महाराष्ट्र यांच्यावतीने दिला जाणारा सन २०२५-२६ चा ‘आदर्श शाळा पुरस्कार’ या शाळेला मोठ्या थाटात झालेल्या कार्यक्रमात पुणे येथे प्रदान करण्यात आला.
सावंतवाडी दि.०५: कणकवलीतील चोरीची घटना ताजी असतानाच चोरट्यांनी आता आपला मोर्चा सावंतवाडी शहराकडे वळवला आहे. शनिवारी मध्यरात्री अज्ञात चोरट्यांनी शहराच्या मध्यवर्ती भागात असलेल्या नगरपरिषद कॉम्प्लेक्स (इंदिरा गांधी व्यापारी संकुल) मधील तब्बल ६ दुकानांचे कुलूप तोडून धाडसी चोरी केली, तर ४ दुकानांमध्ये चोरीचा प्रयत्न केला. या घटनेत एकूण ७ हजार रुपयांची रोकड लंपास करण्यात आली असून, वाढत्या चोऱ्यांमुळे व्यापाऱ्यांमध्ये भीतीचे वातावरण पसरले आहे.
सावंतवाडी दि.०५:जिल्ह्यात गेल्या काही दिवसांपासून थंडावलेली अवैध धंद्यांविरोधातील कारवाई पुन्हा एकदा जोमाने सुरू झाली आहे. स्थानिक गुन्हे अन्वेषण शाखेच्या (एलसीबी) पथकाने सावंतवाडी शहरात धडक कारवाई करत मटक्याचे आकडे घेणाऱ्या एका इसमासह त्याच्या मालकावर गुन्हा दाखल केला आहे. या कारवाईमुळे अवैध धंदेवाल्यांचे धाबे दणाणले असून, एलसीबी पुन्हा सक्रिय झाल्याची चर्चा जिल्ह्यात रंगली आहे.
सावंतवाडी दि.०४: माजी केंद्रीय मंत्री आणि विद्यमान खासदार श्री. नारायण राणे यांच्या वाढदिवसाचे औचित्य साधून भारतीय जनता पार्टीच्या वतीने ‘संसद कोकण समृद्धी महोत्सव २०२६’ अंतर्गत जिल्हास्तरीय टेबल टेनिस स्पर्धेचे आयोजन करण्यात आले आहे. ही स्पर्धा शुक्रवार, १० एप्रिल २०२६ रोजी सकाळी ९:०० वाजल्यापासून सावंतवाडी येथील जिमखाना मैदानावर रंगणार आहे.
सावंतवाडी दि.०४ : तालुक्यातील जिल्हा परिषद पूर्ण प्राथमिक शाळा तळवणे नं. ०२ ची इयत्ता सातवीची विद्यार्थिनी अंतरा बापू मठकर हिने सिंधुदुर्ग जिल्हास्तरीय गोळाफेक स्पर्धेत मोठ्या गटातून प्रथम क्रमांक पटकावून शाळेचे व गावाचे नाव उज्वल केले आहे.