सावंतवाडी दि.१४: सिंधुदुर्ग जिल्ह्यातील दुर्गम आणि ग्रामीण भागातील माध्यमिक शाळांसमोर उभे राहिलेले शिक्षकांच्या कमतरतेचे मोठे संकट पालकमंत्री ना. नितेश राणे यांच्या विशेष पुढाकारामुळे टळले आहे. इयत्ता ९ वी आणि १० वीच्या वर्गांसाठी केवळ २० विद्यार्थी संख्या असतानाही ३ शिक्षकांना मंजुरी देण्याचा ऐतिहासिक निर्णय पालकमंत्र्यांनी शासनाकडून मंजूर करून आणला आहे. या निर्णयामुळे जिल्ह्यातील सुमारे ९० शाळांना जीवदान मिळाले असून हजारो विद्यार्थ्यांचे शैक्षणिक नुकसान टळणार आहे.
‘संच मान्यते’च्या जाचक अटींतून जिल्ह्याला सवलत
‘संच मान्यता २०२४’ च्या नवीन नियमांमुळे कमी पटसंख्या असलेल्या अनेक ग्रामीण शाळांमधील शिक्षकांची पदे धोक्यात आली होती. यामुळे दुर्गम भागातील शाळा शिक्षकांविना ‘पोरक्या’ होण्याची भीती निर्माण झाली होती. मात्र, पालकमंत्री नितेश राणे यांनी शासनाकडे सातत्यपूर्ण पाठपुरावा करून केवळ सिंधुदुर्ग जिल्ह्यासाठी एक वर्षाची विशेष सवलत मिळवून दिली आहे.
शैक्षणिक दर्जा राखण्यासाठी उचलले पाऊल
राज्यात प्रथम क्रमांक: सिंधुदुर्ग जिल्ह्याने शैक्षणिक क्षेत्रात नेहमीच आपला दबदबा राखला आहे. २०२५ च्या निकालात ९९.३२% गुणांसह जिल्हा राज्यात प्रथम आला होता.
निकालाची परंपरा: हाच यशाचा आलेख कायम राखण्यासाठी शिक्षकांची पदे रिक्त न ठेवण्याचा निर्णय अत्यंत कळीचा ठरणार आहे.
“ग्रामीण व दुर्गम भागातील शाळा शिक्षकांविना बंद पडण्याची भीती होती. मात्र पालकमंत्र्यांनी तत्परतेने दखल घेऊन हा प्रश्न मार्गी लावला. यामुळे विद्यार्थी आणि पालकांमध्ये आनंदाचे वातावरण आहे.” — डॉ. दिनेश नागवेकर, उपाध्यक्ष, शिक्षण प्रसारक मंडळ.
शिक्षण प्रसारक मंडळाकडून कृतज्ञता व्यक्त
या निर्णयाबद्दल सावंतवाडी शिक्षण प्रसारक मंडळाचे अध्यक्ष तथा जिल्हा परिषद सदस्य विक्रांत विकासभाई सावंत यांनी पालकमंत्र्यांचे जाहीर आभार मानले आहेत. मंडळाचे उपाध्यक्ष डॉ. दिनेश नागवेकर यांनी प्रत्यक्ष पालकमंत्र्यांची भेट घेऊन पत्राद्वारे कृतज्ञता व्यक्त केली. पालकमंत्र्यांच्या या संवेदनशील निर्णयामुळे जिल्ह्याच्या ग्रामीण शिक्षण व्यवस्थेला मोठे बळ मिळाले आहे.
सावंतवाडी (वा.) यशवंतराव भोसले इन्स्टिट्यूट ऑफ टेक्नॉलॉजी यांच्या माध्यमातून ७ मे रोजी आयोजित करण्यात आलेल्या कमिन्स इंडियाच्या कॅम्पस इंटरव्ह्यूमध्ये ४३ विद्यार्थ्यांची निवड करण्यात आली. कमिन्स ही देशातील अग्रगण्य अभियांत्रिकी कंपनी असून डिझेल व गॅस इंजिन, जनरेटर, पॉवर सिस्टिम तसेच औद्योगिक क्षेत्रासाठी आवश्यक उपकरणांच्या निर्मितीत कार्यरत आहे. देश-विदेशातील विविध उद्योगांमध्ये कंपनीची उत्पादने वापरली जातात._
सिंधुदुर्गनगरी दि.१३: कोकण रेल्वेने प्रवास करणाऱ्या चाकरमान्यांच्या आणि स्थानिक प्रवाशांच्या वाढत्या समस्यांकडे रेल्वे प्रशासन व सरकारचे लक्ष वेधण्यासाठी १७ मे रोजी कसाल येथे पहिल्या ‘सिंधुदुर्ग रेल्वे परिषदेचे’ आयोजन करण्यात आले आहे. “रेल्वे प्रवाशांच्या हक्काच्या सोयीसुविधांसाठी ही निकराची लढाई असून, जिल्ह्यातील प्रवाशांनी आपली एकजूट दाखवावी,” असे आवाहन कोकण रेल्वे प्रवासी समन्वय व संघर्ष समितीचे अध्यक्ष प्रकाश पावस्कर आणि जिल्हा समन्वयक नंदन वेंगुर्लेकर यांनी केले आहे.
सावंतवाडी दि.१३: साखरपुड्याच्या कार्यक्रमाच्या गडबडीचा फायदा घेत अज्ञात चोरट्याने एका महिलेच्या पर्समधील सुमारे ३ लाख ९० हजार रुपये किमतीचे सोन्याचे दागिने लंपास केल्याची घटना सावंतवाडीतील कारिवडे येथे घडली आहे. याप्रकरणी सौ. क्रांती सावंत (रा. नरडवे, कणकवली) यांनी सावंतवाडी पोलीस ठाण्यात तक्रार दाखल केली आहे.
आंबोली दि.१३: “हिंदूंमध्ये एकी नसल्यामुळेच जिहादी मानसिकतेच्या लोकांचे धैर्य वाढते आहे. आता केवळ चर्चा करून चालणार नाही, तर हिंदूंनी संघटित होणे ही काळाची गरज आहे. जर आपला धर्म सुरक्षित राहिला, तरच आपण, आपली मुले आणि आपली पुढची पिढी सुरक्षित राहील,” असे परखड प्रतिपादन भोसरी विधानसभेचे आमदार महेश लांडगे यांनी केले.
सावंतवाडी दि.१३: कित्येक वर्षे उलटली, पण इथला प्रश्न सुटलेला नाही! कोलगाव कुंभारवाडी येथील ग्रामस्थ आणि ‘झिरंग ७ नंबर’ शाळेचे विद्यार्थी आजही एका मोडकळीस आलेल्या सिमेंटच्या खांबांच्या पुलावरून जीव मुठीत धरून प्रवास करत आहेत.📍 भयावह वास्तव: नाल्यावर केवळ ३ सिमेंटचे पोल टाकून बनवलेल्या पुलावरून वृद्ध, महिला आणि शालेय विद्यार्थ्यांना जावे लागते.
सावंतवाडी दि.१३: नव्या दमाच्या गायकांना हक्काचे व्यासपीठ देणाऱ्या २०व्या ‘सम्राट संगीत सितारा २०२६’ या आंतर राज्यस्तरीय गायन स्पर्धेचा बिगुल सावंतवाडीत वाजला! बॅ. नाथ पै सभागृहात पार पडलेल्या पहिल्या प्राथमिक फेरीत स्पर्धकांनी आपल्या सुरांनी उपस्थितांना मंत्रमुग्ध केले.
सावंतवाडी दि.१३: सावंतवाडी-रेडी राज्यमार्गावरील मळगाव घाटीत अपघातांची मालिका सुरूच असून, आज सकाळी एका इको कारचा भीषण अपघात झाला. घाटातील धोकादायक वळणावर चालकाचे नियंत्रण सुटल्याने कार थेट दरीत कोसळली. सुदैवाने, या अपघातात कोणतीही जीवितहानी झाली नाही, मात्र महिनाभरात त्याच ठिकाणी दुसरा अपघात घडल्याने सार्वजनिक बांधकाम विभागाच्या कारभारावर स्थानिकांनी तीव्र संताप व्यक्त केला आहे. मिळालेल्या माहितीनुसार, एमएच ०७ क्यू ७९०४ क्रमांकाची इको कार सावंतवाडीच्या दिशेने जात असताना मळगाव घाटातील एका तीव्र वळणावर हा अपघात घडला. कार कडेला घसरत जाऊन दरीत कोसळली. अपघाताची माहिती मिळताच स्थानिक युवक आणि सामाजिक कार्यकर्त्यांनी तातडीने घटनास्थळी धाव घेत मदतकार्य राबवले आणि कारमधील प्रवाशांना सुखरूप बाहेर काढले. कारचे या अपघातात मोठे नुकसान झाले आहे. सुरक्षेचा प्रश्न ऐरणीवर विशेष म्हणजे, महिनाभरापूर्वी याच ठिकाणी अशाच प्रकारे एक इको कार दरीत कोसळली होती. वारंवार होणाऱ्या अपघातांमुळे या भागातील सुरक्षिततेचा प्रश्न गंभीर बनला आहे. घाटातील तीव्र वळणे, तुटलेले संरक्षक कठडे आणि दिशादर्शक फलकांचा अभाव यामुळे वाहनचालकांना आपला जीव मुठीत धरून प्रवास करावा लागत आहे. लोकप्रतिनिधींची नाराजी अपघाताची माहिती मिळताच पंचायत समिती सदस्य जितेंद्र गावकर यांनी घटनास्थळी धाव घेऊन पाहणी केली. यावेळी त्यांनी सार्वजनिक बांधकाम विभागाच्या दुर्लक्षित कारभारावर ताशेरे ओढले. “या ठिकाणी असलेले तुटलेले रेलिंग आणि कठडे तातडीने दुरुस्त करून ते मजबूत करावेत, तसेच पावसाळ्यात निसरड्या होणाऱ्या रस्त्यावर उपाययोजना करावी,” अशी मागणी त्यांनी केली. भविष्यात मोठी दुर्घटना टाळण्यासाठी प्रशासनाने येथे तात्काळ संरक्षक गार्डरेल, वेगमर्यादा फलक आणि रिफ्लेक्टर्स बसवावेत, अशी मागणी मळगाववासीयांकडून केली जात आहे.